LAOAG CITY – Umabot iti 40 a tattao ti natay iti panagswek ti maysa nga eroplano iti asideg ti erupuerto iti Central Nepal.
Segun ken ni army spokesman Krishna Bhandari, arigna papel a nagsisina ti eroplano.
Inbatad ni Bhandari a mangnamnama a marekobre da amin dagiti biktima kalpasan ti nakaam-ames nga insidente.
Inpakaammo na nga umabot iti 72 a tattao ti nakalugan iti twin-engine ATR 72 aircraft nga op-operaren ti Yeti Airlines ken nagtayab manipod iti Kathmandu ken nagturong koma iti ili ti Pokhara.
Mainaig iti daytoy, nagpaawag a dagus ni Prime Minister Pushpa Kamal Dahal ti emergency meeting iti gabinete na ken ginutigot na dagiti state agencies a tumulong para iti rescue operations.
Naamoan a karaman kadagiti pasahero ket 53 a Nepalese, lima ti Indian, uppat ti Russian ken dua ti Koreans.
Adda pay ti pasahero a naggapo iti Ireland, Australia, Argentina ken France.
Agtultuloy ti imbestigasyon dagiti otoridad tapno maamoan no ania ti nagswekan ti nasao nga eroplano.
