LAOAG CITY – Kinumpirmaran ni Police Major Sheryl Guzman, ti chief of police ti PNP-Paoay ti pannakatay ti maysa a mannalon gapo iti mapapati a pannakatagbat na iti Barangay Sta. Rita iti nasao nga ili.
Nabigbig daytoy a ni Marlon Cochapin, agtawen ti 48, awanan ti asawa ken maysa a mannalon.
Segun kenni Guzman, nakaawat da ti report nga adda ti nakita a bangkay iti kamaisan rason a dagus da a nagturong iti lugar.
Inlawlawag na nga iti inisyal nga imbestigasyon da, nagpakada ti biktima ti ina na tapno mapan na kitaen ti padanom iti talon na ngem saanen a nakasubli ken nakita da laengen a nakadasay daytoy iti kamaisan.
Kunana nga awan met ti rekord ti biktima iti Philippine National Police ken awan met dagiti naipadpadamag a karirriri na.
Inbatad na nga idi nakita ti biktima iti kamaisan ket addan ti uppat agingga iti innem nga orasen a natayen basar iti Rural Health Unit (RHU) iti nasao nga ili.
Iti agdama, agtultuloy pay laeng ti imbestigasyon ti PNP-Paoay no anya ti motibo ti insidente ken para iti pannakabigbig ti suspek.
