LAOAG CITY – Saan laeng a maipanggep iti panangpadur-as ti ekonomiya ti kaadda ti pwersa ti Marcos administration iti pagilian a Switzerland ngem ketdi tapno personal nga agyaman kadagiti Pilipino nga agpapaay iti nasao a pagilian.
Daytoy ti inpetteng ni Presidente Ferdinand Marcos Jr. kabayatan ti panagbitla na iti sangoanan ti Filipino Community idiay Zurich, Switzerland.
Segun ken ni Marcos, dakkel ti parte dagiti Pilipino idiay abroad iti panangpadur-as ti ekonomiya gapu ta dagitoy ti mangipangpangato ti remittances iti Pilipinas.
Kuna na a daytoy ket puon amin ti rigat ken sakripisyo dagiti Pilipino nga agpapaay iti sabali a pagilian kas kadagiti adda idiay Switzerland.
Immuna iti daytoy, inbatad ni Marcos a kanayun a naragsak ti puso na a sumangbay iti sabali a pagilian gapu ta sadino man a paset ti lubong ti pagturungan na ket ti kinagaget ken kinasayaat dagiti Pilipino ti kanayun a maipadpadanon kenkuana.
Innayun na dagiti Pilipino ket maibilang nga ari ken reyna nu maipanggep iti panagtrabaho gapu ta kabaelan iti aniaman a trabaho ken dagitoy ti kanayun a bitbit na a maipagpangas iti sabali a nasyon.
Kabayatanna, nagkari ti presidente a babaen iti tulong ti Department of Migrant workers iti pannagidaulo ni Secretary Toots Ople ket maited amin a kasapulan dagiti OFWs.
Kuna na a daytoy ti mangtutok iti aniaman nga arungaing dagiti Pilipino iti abroad para iti al-alisto a pannakasolbar iti nagduduma a problema.
Nagturong ni Presidente marcos idiay Davos, Switzerland para iti World Economic Forum ken inbatad na a babaen iti daytoy ket naikkan ti gundaway a makaallukoy ti ad-ado nga investors a sumrek ditoy Pilipinas.
