LAOAG CITY – Maragsakan ni Provincial Director Police Col. Julius Suriben iti pannakatiliw ti maibilang kas Top 1 Most wanted Person Regional Level a residente iti ili ti Sarrat.
Iti naiyuswat a press conference, inbatad ni Suriben a basar iti imbestigasyon da ket maipagarop a rinugyan a rinames ti akusado ti biktima nga anak ti live-in partner na idi 2017 no sadinno nga agtawen laeng idi ti ubing ti pito wenno adda iti maikadwa a tukad ti elementarya.
Kuna na nga agarop dua a tawen nga inus-usar ti akusado ti biktima no sadinno nga idi laeng 2022 a nagreport ti ina ti biktima iti Philippine National Police (PNP).
Insigida a nangiyuswat ti imbestigasyon dagiti otoridad agingga a naiparuk-at ti warrant of arrest kontra iti akusado.
Ginandat ti bombo radyo nga alaen ti kabibiangan ti akusado ngem nagkedked nupay aminado iti sangsangwen na a kaso gapu iti panangrames na iti sioman na.
Immuna iti daytoy, nagballigi dagiti otoridad a nangtiliw iti akusado nga agtawen ti 40, mannalon ken residente iti Brgy. 19, Sto. Tomas iti ili ti Sarrat.
Natiliw ti akusado babaen ti bileg ti warrant of arrest gapu iti kaso na a panaglabsing iti Article 266-A iti Revised Penal Code (RPC) a naamendaran kas Statutory Rape ken ti Statutory Rape, defined and penalized iti babaen ti Article 266-A paragraph D iti Revised Penal Code, ken agpada nga awan ti nairekomendar a pagpiyansa na.
Malaksid kadagitoy ket napilaan pay ti akusado iti Rape with Sexual Assault in relation to Republic Act No. 7610 no sadinno a narekomendaran ti 200 a ribo a pisos para iti temporaryo a pannakawaya-waya na.
