LAOAG CITY – Agtultuloy ti imbestigasyon iti agruprupsa a bangkay a nasarakan iti irrigation canal iti Brgy. Malasin iti ili ti Bangui.
Daytoy ti inpakaammo ni PMaj. Ramil Llaranes, hepe ti Philippine National Police-Bangui.
Segun ken ni Llaranes, ti biktima ket nabigbig a ni Germenio Rivera, agtawen ti 84, awanan asawan, saan a makangeg ken makasao, saan a makapagna a nasayaat ken residente iti Brgy. Lanao iti nasao nga ili.
Kuna ni Llaranes a basar iti naiyuswat nga imbestigasyon, naripar dagiti mannalon iti nasao a barangay nga adda ti arig a mangsullat ti panagayos ti danom iti irigasyon rason a napan da kinita ken dita a naduktalan ti agruprupsa a bangkay.
Immuna iti daytoy, inpakaammo ni Llaranes a Disyembre 19 itay napan a tawen a naireport a nagpukaw ti biktima ken napigsa ti tudo iti dayta a gundaway.
Gapu iti daytoy, kuna ti hepe a posible a naiyanod ti biktima manipod iti Brgy. Lanao agingga a nakadanon ti bangkay na iti Brgy. Malasin.
Kabayatanna, inbunannag ti hepe a nadeterminar ti pamilya ti biktima babaen iti suot daytoy a jacket ken relo.
Innayun na a patien met ti pamilya ti biktima nga awan ti napasamak a foul play iti pannakatay na.
