LAOAG CITY – Manamnama nga agtultuloy ti derby iti cockpit arena ditoy siudad ti Laoag iti umuna a lawas ti bulan ti Abril iti baet a maobserbaran ti Holy Week.
Daytoy ket kalpasan a 10 dagiti pimmabor a maiyuswat latta ti derby idinto a maysa ti nag-abstain, partikular ni konsehal Bryan Alcid.
Immuna iti daytoy, inlungalong ni konsehal Jaybee Baquiran ti temporaryo a pannakaitantan ti derby intuno Abril 3 agingga a malpas ti Holy Week.
Kuna na a masapol koma a maikkan ti moral nga obserbasyon daytoy iti baet a legal ti maiyuswat a derby.
Kabayatanna, inbatad ni konsehal Jason Perera a para kenkuana ket Abril 6 ken 7 laeng ti saan a pannakaiyuswat ti derby.
Nu pay kasta, inpakaammo ni konsehal Derek Lao, ti chairman ti committee on games and amusement a naipakammon kadagiti makipagpaset iti derby ti imbitasyon kadagiti nadakamat a petsa ken nakasaganan ti amin.
Gapu iti daytoy, naaramid ti panagbutos ken napagnunumoan a saan nga agsardeng ti derby iti baet a maobserbaran ti Holy Week.
