LAOAG CITY – Balligi a naarestar ti Top 2 Most Wanted Person iti Regional Highway Patrol Unit 1 ken Top 8 iti Police Regional Office 1 iti Brgy.Crispina iti ili ti Banna.
Nabigbig ti akusado a ni Orlando Icari y Mateo aka Rolando Mateo Icari Jr., agtawen ti 43, addaan ti live in partner ken tubo iti Brgy Ipil, Gonzaga, Cagayan ngem agdama nga agnanaed iti Brgy.Paltit iti ili ti Badoc.
Naarestar ti akusado babaen iti panangidaulo ni hepe PMaj. Antonio Sorsano iti PNP-Banna, Provincial Intelligence Unit ken dadduma kameng ti Ilocos Norte Police Provincial Office.
Naiserbi iti akusado ti Warrant of Arrest nga inparuk-at ni Hon. Myra Shiela Marders Nalupta, Presiding Judge ti RTC Branch 65 ditoy siudad ti Laoag gapu iti panaglabsing ti RA 10883 wenno New Anti-Carnapping Act of 2016 a napetsaan ti Marso 13, 2023.
Narekomendaran daytoy ti 300,000 a ribo a pisos para iti temporaryo a pannakawaya-waya na.
Nagtalinaed ti akusado iti PNP-Banna para iti naan-anay a dokumentasyon ken manamnama a maipaima iti korte a naggapoan ti warrant of arrest.
