LAOAG CITY – Pimmusay iti maysa a lalaki kalpasan a napasamak a degrasya iti paset ti Brgy. Tabukbok iti ili ti Marcos.
Binigbig ni Pol. Corporal Roderick Taylan, ti duty Investigator iti PNP Marcos ti biktima ket agtawen ti 26, maysa a mannalon, baro ken residente iti nasao barangay.
Inbatad ni Taylan a basar iti naisayangkat nga imbestigasyon, agpadpadaya ti biktima a nakalugan iti motorsiko na ken agawid koma iti pagtaengan da tapno mangala ti buwa a mamaen na.
Kuna na a naggapo iti Brgy. Santiago nu sadinno a makiin-inom ngem apaman nga agmanmaneho ket maipagarup a naiturog na rason a nakapukawan ti kontrol iti manibela agingga a naidungpar iti puon ti kayo.
Gapo iti daytoy ket nagsagaba ti nakana a sugat iti ulo ti biktima ken dagus a naitaray iti Dona Josefa Edralin Marcos District Hospital ngem naideklara a pimmusay.
Immuna iti daytoy, inpakaammo ni Taylan a binulod laeng ti biktima ti motorsiklo nga inusar na manipod kadagiti kainnuman na ken naduktalan nga unregistered.
Innayun na nga awan met ti suot a helmet ti biktima idi napasamak ti insidente.
