LAOAG CITY – Ginutigot ti Malakanyang ni Batangas 1st District Rep. Leandro Leviste a sangwen ti kaso kontra kenkuana ken agpiyansa kalpasan nga inbilin ti Makati court ti pannakaarestar na gapu iti maipagarop a panaglabsing na iti Public Service Act.
Inbatad ni Presidential Communications Office (PCO) Undersecretary ken Palace Press Officer Claire Castro a mabalin a mangipresentar ti ebidensiya ni Leviste ken ikalintegan ti bukod na a bagi iti korte no agtalinaed ti takder na nga awan ti dakes nga inaramid na.
Dinakamat ni Castro a ti reklamo kontra ken ni Leviste ket bailable, nupay ti agpanpanday linteg ket agdama nga adda iti sabali a pagilian.
Kuna pay ni Castro a kasayaatan no sangwen laengen ni Leviste ti kaso na ken paneknekan na nga inosente daytoy kontra iti korapsyon.
