LAOAG CITY – Kalikagom ti konseho ditoy ciudad ti Laoag a makontrol ti umad-ado a kaso ti rabies ditoy ciudad.
Daytoy ti inbatad ni Vice Mayor Rey Carlos Fariñas kabayatan iti naisayangkat a regular session.
Segun kenni Fariñas, nakaipalaon iti ordinansa a naputar idi 1997 ket naamendaran idi 2003 ti pannakakontrol ti kaso ti rabies ditoy ciudad ti Laoag ngem daytoy ket daanen ken kasapulan a mapabaro.
Inbatad na a nailanad pay iti ordinansa a masapol a mairehistro amin nga aso ken kasapulan nga agbayad ti registration fee dagiti akin-taraken.
Nupay kasta, masayangan ti bise mayor gapo ta saan a naimplementar ti nadakamat nga ordinansa nangruna ket adon dagiti adda ti taraken na nga aso ditoy ciudad.
Inlawlawag na a ti naipalaon iti ordinansa a 25% iti makolektar a registration fee ket mapan iti Barangay idinto a ti 75% ket iti lokal a gobierno ket basit rason a kalikagom na a maipangato ti maited iti barangay tapno maenganyo da nga agkolektar.
Mainaig iti daytoy, inpetteng iti Bise Mayor a masapol a maadal ti ordinansa tapno makita no anya ti kasapulan a mapabaro.
Gapo iti daytoy, dinutukan na ni Sang. Panlungsod Membr RJ Fariñas, ti Chairman ti Committee on Health ken Konsehal Mikee Fariñas, ti Chairman ti Barangay Affairs a mangadal iti ordinansa.
Kabayatanna, kalikagom pay ni Fariñas nga adda ti maestablisar nga animal impounding iti kada barangay ditoy ciudad nga isu ti temporaryo a pakaikabilan dagiti matiliw sakbay a mapaayaban ti City Veterinary.
Kunana a nalaklaka daytoy a wagas ken mainayon ti a maiyalokaran ti pondo para iti tawen 2024.
Innayon na nga amin dagitoy ket makita na a makatulong tapno maipababa ti mairekrekord nga animal bites ken agpositibo iti rabies.
Maipalagip nga idi laeng Mayo 5, nangiparuk-at ti datos ti Provincial Veterinary Office nga umad-ado ti kaso ti rabies dtoy probinsya nnangruna iti ciudad ti Batac ken ciudad ti Laoag.
