LAOAG CITY – Kalikagom ni Sang. Panlungsod Member Angelo Bismark Quidang iti ciudad ti Batac a maiyuswat ti imbestigasyon seknan iti kaawan ti permit dagiti bus a nagluganan dagiti atleta iti Region 1 Athletic Association (R1AA) Meet a naiyuswat idiay San Carlos City, Pangasinan.
Segun kenni Quidang, bayat ti panagrubwat ti delegasyon ti ciudad ti Batac ket adda ti napan nga empleado ti Land Transportation Franchising and Regulatory Board iti San Carlos City ken pinababa dagiti enforcers dagiti nakalugan nga atleta gapo ta naduktalan nga awan ti permit ti bus.
Gapo iti daytoy ket naitantan ti panagawid dagiti atleta iti sumagmamano nga oras ngem napalubusan da met laeng iti panagbyahe babaen iti panangbayabay dagiti enforcers agingga iti ciudad ti Batac ken nagsubli da gapo tan a-impound dagiti bus.
Kunana a maibilang a traumatic experience daytoy kadagiti ubbing ken ti pagsayaatan na ket adda da pay laeng iti pagadalan a nagtalinaedan da kabayatan ti R1AA ken ti lokal a gobierno ti San Carlos ti nangibalkay iti kanen ti delegasyon ti Batac City.
Inlawlawag na a naamoan na daytoy a banag kalpasan nga adda dagiti nagtawag iti staff na rason a madi ti rikna na ngem babaen iti nasayaat a koordinasyon ti lokala gobierno ti Batac ken San Carlos ket natalged a nakaawid dagiti atleta.
Mainaig iti daytoy, inbatad na a no addan to ti maiyuswat a full blown investigation seknan iti daytoy ket karaman kadagiti pagsaludsudan da ket ti Bus Company ken iti Dept. of Education partikular iti akin-iggem iti Transportation Committee.
Kabayatanna, kunana a posible a dagiti napan nagitulod a bus ket adda ti permit na ngem dagiti napan nagsukon ti awanan ti permit.
Innayon na nga idasar nan to daytoy a banag bayat ti sesyon ti Sang. Panlungsod.
