LAOAG CITY – Natiliw ti maysa a lalaki iti ili ti Solsona gapu iti panangtutok na ti paltog kadagiti sumagmamano a residente iti Brgy. Juan iti nasao nga ili.
Basar iti impormasyon manipod iti nailian a pulisya ti Solsona, bayat nga agpadpadaya ni Alpie Jacobo y Quebral, agtawen ti 28, naasawaam ken residente iti Brgy. Juan iti nasao nga ili usar ti motorsiklo na a Yamaha Sniper 155 ket pinagsardeng ti suspek a ni Jerome Andres y Abadilla, agtawen ti 40, awanan ti asawa ken residente iti Brgy. Bagbag, Solsona bayat nga agtatakder iti likod ti lugan na a Toyota Fortuner.
Dita a maipagarup a dinakamat ti suspek nga agsarita da ken ni Jacobo kageddan ti panangala na ti paltog na manipod iti lugan na ken inkasa na daytoy sakbay ti pananggandat na a panangpaputok ti paltog ken ni Jacobo.
Nu pay kasta, dagus a nakataray ni Jacobo ken nagdereto iti kapulisan tapno maireport ti napasamak.
Kabayatanna, malaksid ken ni Jacobo ket pinaturungan pay ti suspek ti nabigbig a ni Emerson Hora y Salvador a residente iti Brgy. Juan iti nasao a met laeng nga ili.
Rumrumuar nga iti dayta a gundaway ket naggapo ti suspek iti dalan nga asideg ti Iglesia Independiente ken apaman a nakadanon iti crossing ket nagsardeng ken dita nga intutok na ti paltog a nakakasa ken ni Hora sakbay a nagturong iti laud direksyon.
Mainaig iti daytoy, inpaturong pay ti suspek ti paltog na kada Santiago Cabaya y Consolacion ken ni Mary-ann Cabaya y Cudal nga agpada met laeng a residente ti Brgy. Juan.
Gapu iti dagus a pannakaireport ti pasamak ken insegida met ti panagresponde ti kapulisan ken balligi a naarestar ti suspek.
Nakumpiskar iti suspek ti cal. 40 pistol a nakita mismo iti passenger seat ti lugan na ngem awanan daytoy ti bala nu pay adda ti magazine na.
Agtultuloy ti imbestigasyon ti kapulisan iti napasamak kagedden ti pannakaduktal ti pudno a motibo iti suspek.
