LAOAG CITY – Tallo a baboy ti ti tinakaw dagiti saan pay a nabigbig a suspek iti Barangay San Marcelino iti ili ti Dingras.
Daytoy ti inbatad ni Police Captain Norman Pentang, ti chief of police iti Philippine National Police iti ili ti Dingras.
Segun kenni Pentang, dagiti baboy ket kukua ni Mr. Jun Gudoy, agtawen ti 33, naasawaan ken residente iti nadakamat a barangay.
Inbatad met ni Barangay Captain Larry Pasalo, iti bigat ti Mayo 28 ket napan nagpakan ni Gudoy kadagiti taraken na a baboy idi nadlaw na a mapukpukaw dagiti tallo kadagitoy ken dagiti dadduma ket agkakapoy.
Rumrumuar a dagiti tallo a natakaw a baboy ket rinukrok dagiti suspek iti igid ti kanal nga asideg iti ubong sakbay a naan-anay nga intaray da dagitoy.
Narekobre iti lugar ti tallo a puraw a cable tie ken maysa a sako a rumrumuar nga isu ti nausar iti insidente, ken ti maysa a dara-dara a kutsilyo ti nakita iti Padsan River.
Naamoan a ti tedted ti dara ket nakita manipud iti nangalaan dagiti suspek kadagiti baboy agingga iti dike nga agturong iti Sitio San Herman iti Barangay Baresbes.
Mainaig iti daytoy, inbatad met ni Pentang nga agtultuloy ti imbestigasyon da iti insidente ti panagtakaw ti baboy nangruna ket adda manen ti kastoy a pasamak iti napalabas a bulan a nakapukawan met ti 10 a baboy.
Kabayatanna, nagpalagip ti kapitan kadagiti addaan ti taraken ti baboy nga agridam.
