LAOAG CITY – Saan pay a nabirukan ti baro a naglibas manipud iti Bahay Pag-asa iti Barangay 48-A, Cabungaan ditoy ciudad ti Laoag, uppat nga aldawen ti napalabas sipud naglibas daytoy.
Daytoy ti inpakaammo ni Mr. Ramelito Piedad, ti mangidadaulo iti Civil Security Unit iti ciudad ti Laoag.
Segun kenni Piedad, iti agdama ket ar-aramiden da amin a wagas tapno maduktalan ti lugar nga ayan ti nasao a baro.
Inlawlawag na nga idi naglibas ti baro ket dagus da metten a nakikoordenar kadagiti amin a Philippine National Police station ditoy probinsya.
Mainaig iti daytoy, patien ni Piedad nga ada pay laeng iti probinsiya ti nasao a baro ken saan pay a nakaadayo isut gapo na nga ikarigatan da tiliwen daytoy.
Maipalagip a naglibas ti baro iti Bahay Pag-asa ditoy ciudad iti malem ti Mayo 29 ken daytoyen ti maikalima a gundaway a nakalibas ti maseknan.
Basar iti inisyal nga impormasyon, maipagarup a napan immisbo ti naka-duty a Civil Security Unit personnel idi ginundawayan ti baro ti naglibas.
Kabayatanna, kuna ni Mrs. Fe Respicio, monitoring social welfare iti Bahay Pag-asa, mismo nga iti gate ti nagruaran ti nasao nga indibidual.
Adda metten ti rekomendasyon ti Civil Security Unit ken ni Mayor Michael Marcos Keon a maiyakar ti personnel a naka-duty iti Bahay Pag-Asa.
Maipalagip a ti nasao nga indibidual manipod iti ili ti Piddig ket naipan iti Bahay Pag-asa gapu iti panagsalungsing na ti RA 9165 wenno Dangerous Drugs Act of 2002 ken menor de edad pay laeng iti dayta a gundaway.
