LAOAG CITY – Kinondenar ni Sangguniang Panlungsod Member Jason Perera ditoy siudad ti Laoag ti maysa a penal provision ti Draft Ordinance mainaig iti pannakaamyendar ti Local Revenue code ditoy siudad.
Segun ken ni Perera, awan ti makita na nga a rason nga agbalin a criminal offense ti saan a pannakaisubmitir dagiti kontrata, dokumento ken amin nga adda ti pakainaigan na iti panagiproseso ti daga partikular iti assessor’s office.
Kuna na nga ad-adda a maawatan na a mamulta dagiti saan a makaipasa dagiti nadakamat a dokumento iti 500 a pisos gapu ta awan ti otoridad ti Sannguniang Panlungsod a mangipataw ti nasao a pannusa wenno criminal offense.
Mainaig iti daytoy, manamnama a maipresentar ti draft ordinance iti public hearing intuno Hunyo 26 tapno maamoan ti komento ti publiko iti nasao a banag.
Naamoan a masapolen ti pannakasukat ti Local Revenue Code ditoy siudad gapu ta nabayagen sipud idi naudi a nabaliwan wenno sipud pay idi 2009 imbes a tunggal lima a tawen a mapabaro.
Kabayatanna, inlungalong ni konsehal Handy Lao ti 5% a bayadan iti revenue dioy siudad imbes a 10% gapu ta ado pay laeng ti in-inot nga agrekrekobre manipod iti pandemiya.
