LAOAG CITY – Dismayado ni Mr. Bhong Austria ditoy siudad ti Laoag iti ME shopping center ditoy siudad gapu iti pannakaibabain ti pamilya na ken napagatapan ti anak na a nagtakaw iti nasao a pasdek.
Segun ken ni Austria, apaman a rumuar da iti pasdek ket naguni ti detector idi ti baro na ti dimmalan.
Gapu iti daytoy, inbatad na a dita a pinagsubli-subli dagiti guards iti nasao a shopping center ti baro na iti namitlo a daras ket naguni ti detector machine, mangipasimudaag nga adda ti nailibas a saan a nabayadan.
Nu pay kasta, kuna ni Austria a kinapkapan da ti anak na ken maipagarup nga inulit-ulit dagiti empleado ti panangeksamin ti anak na ngem awan a pulos ti nakita da a tinakaw na.
Gapu iti daytoy, inpetteng ni Austria nga arig na saan a naited ti respeto kadakuada gapu ta nabuya ti ado a tattao ti panangsitsita dagiti guards iti baro na iti laksid nga awan ti tinakaw daytoy.
Kuna ni Austria a gapu iti napasamak ket kalikagum na a makasarita ti agtagikua ti nasao a shopping center ken makita a naimbag dagiti detector machine dagitoy gapu ta mapagbalbalin a dakes ti tao nga awan ti aramid na.
Naamoan a ti baro ni Austria ket nagbakasyun laeng ditoy Pilipinas kadua na ti ina na ken agpada dagitoy a naggapo iti estados unidos.
