LAOAG CITY – Paimbestigaran ni Senate Committee on Agriculture, Food and Agrarian Reform a ni Sen. Francis “Kiko” Pangilinan ti pannaggandat a maipastrek ti agarup P700 million a gatad ti bagas manipud Vietnam, kalpasan ti pannakarekobre iti dua a barko nga addaan ti kargana a sumurok-kumurang 20,000 a metriko tonelada a bagas.
Segun ken ni Sen. Francis “Kiko” Pangilinan, mangidadaulo iti komite, kalikagum ti panagdengngeg nga amoen dagiti anomalia dagiti nasao a shipment ken no apay nga awan daddakel a rice smuggler ti maibalbalud ken mapagsungsungbat iti baet dagiti linteg ti pagilian kontra kadagiti awan ti papelna a produkto iti agrikultura.
Dinakamat ni Pangilinan a kalikagumna a maiwayat ti pannagdengngeg sakbay nga agleppas ti bulan ti Oktubre.
Inbatad ti Senador a masapol a mapagsungbat dagiti ahensia nga adda iti likudan iti insidente a naglabsing iti linteg ti pagilian.
Iti sesyon ti Senado idi napalabas a lawas ket impublikar ni Pangilinan ti pannakarekobre ti dua a barko nga MV Ty Son 2 ken ti V Lucky Star idi Setiembre 17 ken 21 nga addaan dagitoy ti agarup P700 million a gatad ti nagtipon a kargamento.
Basar kadagiti report, nagbinnuligan ti Bureau of Customs (BOC), Department of Ariculture ken ti Philippine Navy ti pannakaiwayat ti operasion gapu kadagiti nakaskasdaaw a dokumento ken ti pannakakanselar dagiti masapol a sanitary permit.
Mainaig iti daytoy, addaan ti karga a 12,500 a metriko tonelada a bagas ti MV Tay Son idi ginandatna nga agtalaw iti Port ti Davao a saanna a kinumpleto dagiti masapol a proseso ti Customs.
Iti baet daytoy, narekobre met iti Port iti Limas ti MV Lucky Star a nagkarga ti agarup 7,500 a metriko tonelada ti bagas a saan a nagsilpo ti detalye ti import permit-na iti aktual a karga ti nasao a barko.
