LAOAG CITY – Manamnama ti panangkasarita ti guidance counselor iti Sarrat National High School – Main Campus iti ili ti Sarrat kadagiti estudyante a nagkakabil iti ruwar ti nasao a pagadalan ita nga aldaw.
Segun ti Guidance Counselor ti nasao a pagadalan, idi koma paylaeng kalman ti panagsasarita da ngem saan a napan nagpakita iti opisina na dagiti nasao nga estudyante.
Kuna na a no saan paylaeng a mapan makisarita dagiti maseknan nga estudyante kenkuana ket dagitin ton nagannak da ti paayaban da.
Naamoan a daytoyen ti maikadwa a gundaway nga adda ti napasamak a panagririri dagiti estudyante iti ruwar ti pagadalan no sadinno a ti immuna ket napasamak idi martes kabayatan ti panagawid dagiti agad-adal.
Inpakaammo ti guidance counselor a ti inisyal a duktalna ket saan a nagkikinnaawatan dagiti estudyante gapu iti basketball.
Innayonna a dagiti estudyante a karaman iti nasao nga insidente ket Grade 9, 10 ken 11 no sadinno nga adda pay dagiti nakiraman nga outsiders.
