LAOAG CITY – Inyistorya ni Mr. Jerald Manera iti Barangay Sulquiano iti ili ti Dingras ti kapadasan na seknan iti maipagarop a gandat a pannakahold-up na a rason ti panagsagaba na ti sugat iti sumagmamano a paset ti bagi na.
Segun kenni Manera, bayat a nakalugan iti motorsiklo na a mapan iti maysa a convenience store ken nakadanon iti batog ti bypass ket maipagarop nga adda ti nangsada kenkuana.
Inlawlawag na a bimmaba iti motorsiklo na gapo ta ti inpagarop na ket agpatulong laeng ti lalaki kenkuana ngem idi nakababa ket maipagarop a tinutukan ti maseknan ti kutsilyo ti likod ni Manera.
Gapo iti daytoy, inbatad na a nagtaray a nagsagabaan ti sugat iti bagbagi na ken naiggaman ti lalaki ti bado na ngem inwadag na agingga a natulid ti lalaki isut gapo na a ginundawayan na metten a nagsubli iti ayan da usar ti motorsiklo na.
Nupay kasta, kunana a maipagarop a kinamat isuna ti lalaki ngem idi nakadanon iti adda ti silaw na ket nagsardengen ti maseknan.
Inbatad na a nagpatulong isuna iti maysa a pagtaengan rason a napan da met kinita iti lugar a nakapasamakan daytoy ngem ti laengen nakita da ket ti tsinelas a mismo ni Manera.
Mainaig iti daytoy, kuna ni Manera a ti iggem na iti dayta a gundaway ket ti cellphone na ken ti 1,600 a pisos nga isu ti patien na a kalikagom nga alaen ti lalaki kenkuana.
Saan met a malasin ni Manera no siasinno ti lalaki gapo ta naka-abungot, naka-kallugong, naka-jacket ken nasipnget iti lugar.
Naireport met iti Philippine National Police daytoy babaen kadagiti nagpatulungan na.
Kabayatanna, naamoan ni Manera nga iti kallabes ket adda manen ti insidente ti maipagarop nga hold-up iti nadakamat met laeng a lugar ken ti biktima ket maysa a babai ken naala iti daytoy ti tallo ribo a pisos.
