LAOAG CITY – Umad-adu dagiti maipapaayan ti taraknen a baboy iti babaen ti Agri Ka Dito program ti gobierno probinsial.
Inlawlawag ni Provincial Veterinarian Dr. Loida Valenzuela a paset daytoy iti kalikagum ni Gob. Matthew Marcos Manotoc nga in-inut a mangisubli iti sigud a kinaadu dagiti taraken a baboy ditoy probinsia.
Inbatadna nga adda ti pundo ti gobierno probinsial a nailatang a paggatang ti burias a maibunong kadagiti kakailian nga interesado nga agtaraken ti baboy.
Nupay kasta, inpalgakna a maiyun-una a maikkan dagiti naapektaran dagiti tarakenda a baboy iti African Swine Fever itay kallabes a saan a naikkan ti tulong manipud iti Philippine Crop Insurance Corporation wenno PCIC.
Segun kenkuana, agtultuloy ti panangipaay ti gobierno probinsial babaen iti Provincial Veterinary Office kadagiti “paraphernalia” a mausar iti “disinfection” wenno pagpasuyot kadagiti ubong wenno pagtaraknan ti baboy a naapektaran ti African Swine Fever itay kallabes.
Kabayatanna, inbunannag ni Valenzuela nga adda pay dagiti maibunbunong manipud iti opisinada a makatulong a mangnayun iti pamastrekan dagiti kakailian kangrunaanna kadagiti nagkiddaw iti Agri Ka Dito kas iti kalding ken manok.
