LAOAG CITY – Kinumpirmaran ni Barangay Chairman Ruben Ancheta iti Barangay Barit ditoy ciudad ti Laoag ti pannakatay ti kabarangayana gapo iti rabies kalpasan ti pannakakagat na iti aso a maipagarop a positibo iti rabies.
Basar iti impormasyon, bulan ti Marso idi maipagarop a nakagat ken iti laeng ina na ti panangibagaan na iti daytoy.
Nagbalin a kampante ti nasao a lalaki gapo ta napan nagpatandok kalpasan a nakagat.
Nupay kasta, naggurigor daytoy iti tallo nga aldaw ken ummuna a naipan iti Black Nazerene iti ili ti San Nicolas ngem naiyakar iti Mariano Marcos Memorial Hospital and Medical Center iti ciudad ti Batac.
Naamoan nga itay parbangon, Hulyo 4 ket pimmusay daytoy bayat nga adda iti nadakamat nga ospital.
Mainaig iti daytoy, saan met a maimansayag ti nasao a lalaki kas panangsurot iti pagaladan ti Dept. of Health.
Kabayatanna, saan met nga ammo no kasano ti pannakakagat ti maseknan iti aso.
