LAOAG CITY – Inlawlawag ni Barangay Chairman Ruben Ancheta iti Barangay Barit ditoy ciudad ti Laoag a nabakunaanen ti anti-rabies ti pamilya ti lalaki a pimmusay gapo iti pannakaimpektar na iti rabies.
Segun kenni Ancheta, idi kalman met laeng ket nagturong dagiti personnel ti City Health Office iti barangay da para iti daytoy.
Inbatad na nga iti agdama ket makumikom ti City Health Office iti pannakaisayangkat ti contact tracing kadagiti nakapulapol ti maseknan nangruna ket idi pay laeng bulan ti Marso a nakagat.
Mainaig iti daytoy, kuna ti kapitan nga ita ket adda ti maiyuswat a general assembly ken mapagsasaritaan ti husto a panagtaraken ken no anya ti nasken nga aramiden no makagat ti aso.
Kunana a kanayon met ti panangpalagip dagiti opisyal iti kabarangayan da a saan da nga ipalubos nga agwarang-warang dagiti aso da ngem saan a maliklikan nga adda latta dagiti saan a sumurot.
Maipalagip a pimmusay ni Mr. Roderick Campus bayat nga adda iti ospital gapo iti pannakaimpektar na iti rabies.
