LAOAG CITY – Inaprobaran ti Sangguniang Panlalawigan ti ordinansa pakaseknan iti panagusar ti light visibility vest kadagiti national highway ditoy Ilocos Norte.
Segun kenni ABC Federated President ken Chairman ti Committee on Transportation Elmer Faylogna, daytoy ket kalpasan nga iti umuna a kwarter ti tawen 2023 ket umabot iti 96 a desgrasia ti nairekord ti Philippine National Police ditoy probinsia.
Inbatadna nga agarup 80 a porsiento ket mapaspasamak iti national highway idinto a ti nabatbati a 20 a porsiento ket adda iti provincial ken barangay road.
Inlawlawagna a babaen iti naputar nga ordinansa ket mamandar dagiti amin a motorista, rider ken driver nga agiturturong ti motorsiklo, tricycle, electric bicycle, kurong-kurong ken dagiti farm machineries nga agisuot dagitoy ti light visibility vest kabayatan a dumaldalyasatda iti national highway.
Kunana a dagiti aglabsing iti ordinansa ket mapatawan ti pannusa para iti first offense ket agbayad ti 500 a pisos wenno ag-community service iti tallo nga aldaw.
Para iti second offense, agbayad ti 1 ribu a pisos wenno wenno ag-community service iti pito nga aldaw.
Para iti third offense, agbayad ti 1,500 a pisos wenno wenno ag-community service iti pito nga aldaw iti uneg ti barangayda.
Mainaig iti daytoy, inpakaammo ni Ilocos Norte ABC Federated President Faylogna a maipatungpal ti nasao nga ordinansa mangrugi ti oras ti ala y sais ti rabii agingga ti ala y sais ti bigat.
Innayonna a sakbay ti pannakaaprobar ti ordinansa ket adda ti naisayangkat a committee hearing and consultation para kadagiti amin a maseknan nga stakeholders tapno makissayan ken maalay-ayan dagiti mapaspasamak a desgrasia ditoy probinsia.
Kabayatanna, naammoan nga umabot iti 180 a pisos agingga 250 a pisos ti balor ti maysa a light visibility vest.
