LAOAG CITY – Inbatad ni Health Undersecretary Enrique Tayag a saan a maliklikan nga adda latta dagiti tattao a kaykayat da paylaeng ti agpatandok no makagat da ti aso.
Inaramid na daytoy kabayatan ti naiyuswat a press conference para iti “Sulong Kalusugan Caravan para sa mga Katutubo” iti Teen’s Center, Municipal Hall iti ili ti Nueva Era.
Nupay kasta, inbalakad ni Tayag a masapol nga iwalinen ti panagpatandok imbes ket mapan agpabakuna a dagus kontra iti rabies no makagat ti aso.
Segun ken ni Tayag, ti kasayaatan nga aramiden no makagat ti aso ket bugwan a dagus ti nadalos a danom ken mapan agpabakuna kontra iti rabies.
Innayon na a 90 a porsiento a matay ti virus a sumrek iti bagi no mabakunaan kontra iti rabies.
Kabayatanna, inpakaammo ni Mayor Aldrin Garvida iti ili ti Nueva Era nga adda ti ordinansa da a masapol nga amin nga aso iti nasao nga ili ket mairehistro iti kada barangay.
Inpasigurado pay ti mayor nga adda ti umdas a bakuna da kontra iti rabies gapu ta maysa daytoy kadagiti iprayprayoridad da.
