LAOAG CITY – Kalikagum ni Laoag City Vice Mayor Carlos Farinas a temporario a maipasueldo kadagiti empleado ti Laoag City General Hospital ti tallo a bulan a sueldo daytoy.
Segun kenkuana, adda ti 80 ribu a pisos iti kada bulan ti maaw-awatna a sueldo no sadino adda ti pakabuklan a 240 ribu a pisos iti uneg ti tallo a bulan.
Inbatadna a babaen iti daytoy a wagas ket adda ti mausar a kuarta a pangpasueldo kadagiti empleado ti nasao nga ospital.
Nupay kasta, inlawlawagna a nairanta laeng daytoy para kadagiti empleado nga adda iti nababa a position wenno designation iti Laoag City General Hospital.
Kunana a napanunutanna daytoy nga addang tapno saan a ma-delay wenno maibayag ti pannakaipaay ti sueldo dagiti empleado ti balay-pagagasan.
Innayonna a masapol ti koordinasion ti nadakamat nga ospital ken ti City Treasury Office sakbay a mangiyisyu daytoy ti tseke nga agdagup ti 240 ribu a pisos.
Immuna ngem iti daytoy, adda ti naawat a report ti Bise Mayor nga idi damo ket sumagmamano a lawas laeng a maitantan ti sueldo dagiti empleado ti Laoag City General Hospital agingga a dimmanonen iti sumagmamano a bulan sakbay a maawatda ti sueldo dagitoy.
