Konsehal Jaybee Baquiran ditoy ciudad ti Laoag, kalikagom na a madalusan iti kabiitan a panawen dagiti lugar nga ayan dagiti dingwen a pimmusay bayat ti Bagyo Egay

LAOAG CITY – Kalikagum ni Sangguniang Panlungsod Member Jaybee Baquiran a makita ken madalusan dagiti naruay nga ayup kas dagiti baka ken kalding a natay a nagtalinaed iti Brgy. Lapaz ken Brgy. Gabu ditoy siudad ti Laoag.

Daytoy ket kalpasan a naiyanod dagitoy kabayatan iti iduduprak ti Bagyo Egay ditoy probinsia iti kallabes.

Inbatad ni Baquiran a posible a pagtaudan daytoy iti sakit dagiti maseknan a residente ken ti aglawlaw.

Kunana nga indasarna daytoy a banag iti lokal a gobierno gapu ta masapol dagiti nasao a Barangay ti katinnulong tapno maikkat ken madalusan dagiti nakaikabilan a lugar dagiti natay a dingwen.

Mainaig iti daytoy, inrekomendar ni Vice Mayor Carlos Farinas a maiyuman daytoy a banag iti City Environment and Natural Resources nga idadauloan ni Ms. Miles Pascua ken City Agriculture Office tapno matulungan dagiti nadakamat a Barangay.

Innayon a masapol a maikali dagitoy ken obligasyon ti siudad a mangakop kadagitoy.