LAOAG CITY – Nauram ti maysa a pagtaengan a kukua ni Mr. Joey Lauricio iti Barangay 23 ditoy ciudad ti Laoag.
Ti nasao a balay ket dua a kadsaraan ken adda ti patagwab na iti sangwanan na nga isu ti agserserbi a shop ni Laurucio a pagtarimaanan na kadagiti nagduduma nga appliances.
Segun kenni Lauricio, manarimaan ti panagtarimaan na idi adda ti pimmutok iti maikadua a kadsaraan ti pagtaengan da ken segundo laeng ti napalabas ket dakkelen ti apoy.
Kunana a saan na nga ammo no anya ti eksakto a napasamak ngem gapo iti nadakamat nga uram ket awan pulos ti naisalbar da a ramit iti pagtaengan.
Inbatad na a karaman pay a nauram ket dagiti appliances da ken kwarta a nakadulin.
Malaksid iti pagtaengan ni Mr. Lauricio, nairaman pay a nauram ti pagtaengan ti kabsat na ken sumagmamano a parte ti shop na.
Karaman kadagiti nagresponde ket ti Bureau of Fire Protection ditoy ciudad ti Laoag ken iti ili ti San Nicolas pakairamanan ti Fire and Rescue truck ni Vice Mayor Carlos Fariñas.
Naamoan a pinuted met dagiti kameng ti Ilocos Norte Electric Cooperative ti linya ti kuryente dagiti sumagmamano a pagtaengan bayat ti pannakasebseb ti apoy.
Mainaig iti daytoy, awan met ti nasugatan wenno nadangran iti napasamak nga uram.
Kabayatanna, agtultuloy met ti imbestigasyon dagiti kameng ti Bureau of Fire Protection no anya ti namunganayan ti uram.
