LAOAG CITY – Inbatad ni Fire Senior Officer II Victor Caise, Chief iti Intelligence and Investigation Section iti Bureau of Fire Protection ditoy ciudad ti Laoag nga umabot iti 3,675,000 a pisos ti balor dagiti nadadael gapo iti uram iti pagtaengan iti Barangay 23 ditoy ciudad ti Laoag.
Segun kenni Caise, ti nasao a balor dagiti nadadael ket imbasar da iti Operational Procedures Manual da.
Inlawlawag na nga iti inisyal a panangimbestigar da ket electrical problem ti namunganayan ti uram ngem iysuwat da pay ti naun-uneg nga imbestigasyon.
Dinakamat na a basar iti palawag dagiti akin-balay, aglutluto da idi nakangeg da ti pimmutok iti kwarto ken nakita dan nga adda ti asok a rumrumuar.
Mainaig iti daytoy, kunana nga idi malmalpas ti panangsebseb da iti apoy ket immasideg ti anak a babai ni Mr. Joey Lauricio no sadinno inbaga na nga adda ti vault a naglaon ti agarop 300 a ribo a pisos.
Kunana a ti nasao a kwarta ket isu ti usaren ti pamilya a pangrugyan da.
