LAOAG CITY – Indauloan ni Mr. Arwind Santos a maysa nga ambassador ti International Basketball Federation wenno FIBA dagiti simmangpet ditoy probinsia a mangbukbukel iti FIBA Naismith Trophy Tour.
Mainaig iti daytoy, impadanonna ti napalaus a panagyamanna iti dakkel a suporta ti gobierno iti pannakaisayangkat ti FIBA World Cup iti pagilian manipud ken ni Pres. Ferdinand R. Marcos Jr., Senador Imee Marcos, Gov. Matthew Marcos Manotoc ken ni Bise Gob. Cecilia Araneta Marcos.
Inlawlawagna a maipaspasiar ti tropio a premio ti mangabak iti FIBA World Cup, immuna iti nadumaduma a pagilian, ken kalpasan na iti nadumaduma a paset ti pagilian kas idiay Davao, Cebu, Metro Manila ken maudi ditoy Ilocos Norte.
Kabayatanna, kas ken ni Santos, impeksa ni Mr. James Meneses, Head, Assistant VP, Channel & Content Marketing ti Cignal TV a kadua ni Santos nga adda ditoy probinsia ken karaman iti naisayangkat a press conference ti napalaus a panagyamanna iti gobierno probinsial ti Ilocos Norte.
Inbunannagna a babaen iti tulong ti probinsia ket saanda a marigatan iti panagturongda kadagiti mabigbig a lugar a pakaipasiaran ti nasao a tropio.
Inpanamnamana a babaen iti pannakaipasiar ti tropio kadagiti nagduduma a lugar ditoy Ilocos Norte ket maiyammo met dagitoy a lugar iti nadumaduma a paset ti lubong.
Malaksid iti daytoy, impalgakna a ni Pres. BBM ti mangi-toast iti bola iti pannakalukat ti FIBA World Cup 2023 idiay Philippine Arena ket manamnama ti naan-anay a suporta dagiti filipino a mamagbalin iti Pilipinas a kaaddoan ti mapan agbuya iti pannakalukat ti FIBA World Cup.
Kabayatanna, inpakaammo ti bise gobernador a ti tropio ti mangabak iti FIBA World Cup ket maawagan ti Naismith trophy kas pammigbig iti nangimbento iti basketball a ni James Naismith.
