LAOAG CITY – Naragsak nag inpakammo ni Mayor Michael Marcos Keon ditoy ciudad ti Laoag a mabayaden ti makabulan a sweldo dagiti permanente nga empleado ti Laoag City General Hospital (LCGH).
Daytoy ket kalpasan a nagbayad ti Philhealth ti 2.2 milyon a pisos iti napalabas a dua a lawas.
Segun kenni Keon, adda ti pannakisarsarita da kadua na ni Dr. Marsha Lou Wafan, mangidadaulo ti Laoag City General Hospital kadagiti opisyales ti Philhealth ken babaen iti daytoy ket maipaayen ti sweldo dagiti empleado iti nadakamat nga ospital.
Kunana pay a nangbukel ti grupo ti Philhealth nga isu ti mangtutok para iti konsolidasyon ti claim ti Laoag City General Hospital.
Mainaig iti daytoy, inpasigurado na nga agtultuloy ti pannakikoordenar da iti Philhealth tapno masolbar ti problema ti ospital a kas iti inbaga na kadagiti empleado idi nagsasango dagitoy.
Kabayatanna, inbatad ni Dr. Wafan nga ita a lawas ti pannakaited ti sweldo dagiti empleado ti ospital ken ken ikarigatan da nga ipaay para iti dadduma pay a sweldo dagitoy.
