LAOAG CITY – Nabagkong ti maysa a lalaki babaen iti saan pay a nabigbig nga indibidual iti Barangay 1 iti ili ti San Nicolas.
Binigbig ni Police Captain Ashley Cacayorin, ti Deputy Chief of Police ti Philippine National Police iti ili ti San Nicolas ti biktima a ni Kevin Louise Deuz, agtawen ti 29 ken residente iti Barangay Nangalisan-A ditoy ciudad.
Segun kenni Cacayorin, nagreport kadadakua ti ina ti biktima a nangibaga a nabagkong ti anak na idi rabii.
Inlawlawag na a naggapo ti grupo ti biktima iti Barangay Nangalisan ditoy ciudad ti Laoag ken napan da gimmatang ti arak iti tiangge iti ili ti San Nicolas ken ditoy a naka-engkwentro da ti grupo dagiti suspek a nakalugan ti pick-up nga agmaris ti orange nga addaan ti plate number a IAE 6527.
Inbatad na nga iti inisyal nga imbestigasyon ket kinomprontar ti maysa kadagiti suspek ti kadua ti biktima a ni Joel Sulit, agtawen ti 29 ken residente iti Barangay 52-A, San Mateo, Laoag City.
Ditoy a kellaat a dinanog ti maseknan ni Sulit iti namindua a daras ken naganawa ni Deuz ngem ditoy metten a binagkong ti saan pay a nabigbig a suspek iti namin-dua a daras a nangitunda ti panagsagaba na ti sugat iti akin-kannigid a bakrang na.
Kalpasan daytoy ket dagus a naglibas dagiti suspek ken nagturong da iti abagatan.
Naitaray met ti biktima iti Mariano Marcos Memorial Hospital and Medical Center iti ciudad ti Batac ken dimmalan iti operasyon ken iti agdama ket addan iti nasayaat a kondisyon.
Kabayatanna, manarimaan met ti manhunt operation dagiti otoridad ken nakikoordenar dan iti Land Transportation Office (LTO) kalpasan a naala da ti plate number ti lugan dagiti suspek.
