LAOAG CITY – Nagballaag ni Atty. Julius Balbas, Election Officer ti Commission on Elections ditoy siudad ti Laoag kadagiti kandidato para iti Barangay ken Sangguniang Kabataan Elections a naiget a maipawil ti panangitandudo ti bagida iti online agingga a saan pay a nangrugi ti campaign period.
Segun kenkuana, addanto ti resolusion ti Commission on Elections a mangkita kadagiti maseknan a kandidato para iti maisayangkat a premature campaigning.
Inbatadna a responsibilidad dagiti kandidato ken dagiti botante a sumurot kadagiti amin a pagalagadan nga inyatnag ti Commission on Elections.
Mainaig iti daytoy, inpakaammo ni Atty. Balbas a saanen a dimmanon pay ti 15 dagiti kimmamakam a nagipila ti kandidaturada iti maudi nga aldaw ti panagipila ti Certificate of Candidacy ditoy siudad ti Laoag idi kalman.
Kunana a basar iti inisyal a datosda, umabot iti 1,900 ti nagipila ti Certificate of Candidacy ditoy siudad ken manarimaan pay laeng ti panangukkonda ti pakabuklan a datos kabayatan a maisursurat daytoy a damag.
Inpalgakna gapu iti naiget a panangarisit ti Commission on Elections kadagiti amin a nagipila ti kandidaturada ket adda ti tallo ti saanen a nagtuloy pay gapu ta naduktalan nga overage dagitoy ken nailawlawag met a naimbag kadagiti maseknan.
Inbagana nga adda ti tallo dagiti agbibinnalubal a kapitan iti kada barangay ditoy siudad ti Laoag ngem kaadduan ditoy ket unopposed candidates wenno awan ti kalabanda ita nga eleksion.
Kunana a kalpasan ti maysa wenno dua a lawas ket mangruginto metten ti pannakaisayangkat ti seminar para kadagiti 783 a mangisursuro nga agserbi kas Board of Election Tellers iti Barangay ken Sangguniang Kabataan Elections kadagiti 261 clustered precincts iti intero a siudad.
Kabayatanna, manamnama nga agtataripnong ti Commission on Elections ken ti Philippine National Police pakaseknan iti areas of concern a posible a naiget a mabantayan ditoy siudad ti Laoag ita nga eleksyon.
