LAOAG CITY – Pormalen nga inpatugaw ti National Electrification Administration wenno NEA ni Mr. Cipriano “Perry” Martinez III nga Acting General Manager ti Ilocos Norte Electric Cooperative wenno INEC.
Daytoy ket kalpasan a napagsapata babaen ken ni National Electrification Administration Administrator Antonio Mariano Almeda.
Mainaig iti daytoy, pinasingkedanna nga agpaut iti innem a bulan ti panagakemna kas General Manager ti Ilocos Norte Electric Cooperative.
Mamati a daytoy ti napili ti National Electrification Administration a temporario a mangiwanwan iti nadakamat a kooperatiba agsipud ta namnamaenda nga al-alisto a maurnos dagiti parikut iti Ilocos Norte Electric Cooperative babaen iti panagtinnulong ti gobierno probinsial ti Ilocos Norte ken ti National Electrification Administration.
Imbatadna a saan met a linged iti amin dagiti parikut a pagdaldalanan ti nasao nga electric cooperative kangrunaanna iti panagrekreklamo dagiti kakailian iti serbisio ti Ilocos Norte Electric Cooperative.
Pakaseknan daytoy, mangnamnama ni Martinez a makatulong tapno masolusyonan dagiti parikut ti kooperatiba.
Inlawlawagna a maysa kadagiti immuna nga inaramidna ti panangtaripnongna kadagiti empleado ken dagiti mangidadaulo kadagiti nagdumaduma a departamento tapno idasarna ti planona nga ipatungpal iti Ilocos Norte Electric Cooperative.
Impalgakna a kangrunaan a direktiba ni Gob. Matthew Marcos Manotoc kenkuana ket ti pannakapasayaat ti serbisio ti Ilocos Norte Electric Cooperative ken ti pannakaipababa ti pagbayad ti kuryente.
Innayonna a saanen a daytoy ti panawen ti panagbibinnabalaw no di ket ti panagtitinnulong a mangkita no ania dagiti nasken a maaramid tapno masolusyonan ti problema a sangsangwen ti kooperatiba.
