LAOAG CITY – Dinayaw ni Bise Gobernador Cecilia Araneta Marcos ti “Rice Paddy Art” nga inaramid ti Ilocos Norte Agricultural College wenno INAC.
Inbunannagna kabayatan ti panangisunona ken ni Gob. Matthew Marcos Manotoc a kangrunaan nga agsarita iti “Grand Opening Ceremony” iti nasao a rice paddy art a nakaitampokan ti gobernador a maysa daytoy a nakapinpintas a bunga ti art, siensia ken agrikultura a kas met iti panangiladawan ni Dr. Shirley Agrupis a presidente ti Mariano Marcos State University wenno MMSU.
Mainaig iti daytoy, kiniddaw ti bise gobernador ti pannakaipaay ti nabara a palakpak para kadagiti nangaramid iti nasao a “rice paddy art” nangnangruna kadagiti agad-adal iti agrikultura iti Ilocos Norte Agricultural College.
Kagiddan daytoy, nagyaman pay ti bise gobernador iti MMSU a kaunaan a nangaramid iti “rice paddy art” ditoy probinsia.
Mangnamnama ni Marcos a ti nasao a rice paddy art ti pangrugyan ti ad-adu pay a panagbinnulig ti Mariano Marcos State University ken ti Ilocos Norte Agricultural College.
Kabayatanna, impadanon ti bise gobernador ti panagpadispensar ni Gob. Manotoc iti saanna a pannakaatendar iti nasao nga aktibidad.
Inpakaammona a napalaus ti panagyaman ti gobernador iti Ilocos Norte Agricultural College iti dakkel a tulong nga ipapaayda kadagiti agad-adal nangnangruna iti benneg ti agrikultura.
Inbunannagna a para iti gobernador ti grand opening ti rice paddy art ti mangipamatmat iti kinabaknang iti panagpanpanunut dagiti adda iti likud ti panagballigi ti nasao a proyekto.
Kunana a ti napintas a nagresultaan ti rice paddy art ti mangipamatmat iti dakkel nga akem ti agrikultura iti pannakatagiben ti nasayaat a salun-at ken iti nasayaat a pannakatagiben ti komunidad.
Ginutigotna ti tunggal maysa a mangipaay ti pammadayaw kadagiti amin a mannalon nga Ilocano iti awan pannakabannogda a mangannong iti trabahoda tapno masigurado ti kaadu ti apit a para iti probinsia.
Innayon ti bise gobernador a mangnamnama ti gobernador iti panangitultuloy ti Ilocos Norte Agricultural College kadagiti programa a dakkel a tulong iti kalikagum ti administrasyon a mangpadur-as iti agrikultura para iti nataltalged, natibtibker ken nadurdur-as a probinsia.
