LAOAG CITY – Nalukatanen para iti publiko ti kaunaan a “Rice Paddy Art” ti Ilocos Norte Agricultural College wenno INAC iti ili ti Pasuquin.
Daytoy ket kalpasan ti naisayangkat a Grand Opening Ceremony para iti nasao a proyekto ti nadakamat a pagadalan a nakibinnuligan ti Phil. Rice Institute ken ti Mariano Marcos State University.
Impalgak ni Mr. Almer Anatolio Ratuita, principal ti Ilocos Norte Agricultural College nga awan ti sabali a napanunutda nga itampok iti nasao a proyekto no saan a ni Gob. Matthew Marcos Manotoc.
Inlawlawagna a daytoy ket gapu iti awan sarday a suporta nga ipapaay ti gobernador ken ti gobierno probinsial ti Ilocos Norte iti eskuelada.
Segun kenkuana, immunan a nangipaay ti gobernador ti backhoe ken naruay a sabsabali pay a kagamitan a pagtalon ken adda pay ti manarimaan a proyektona a “food processing plant” a maipatakder iti Ilocos Norte Agricultural College.
Kunana a ti Philrice ti makaammo kadagiti naimula a variety ti pagay iti balligi a pannakaiyestablisar ti nasao a proyekto.
Impalgakna a naidumduma ti kinaragsakda pakairamanan dagiti estudiante ti agrikultura a nagraep apaman a nakitada ti resulta ti inaramidda wenno ti nalawag a pannakakita iti rupa ti gobernador pakairamanan ti naganna iti aglawa iti 1,600 square meters a kataltalonan.
Kabayatanna, inbunannag ni Ratuita a maysa kadagiti gagemda a nangaramid iti “rice paddy art” ket tapno marikna dagiti mannalon nga adda ti “art” iti “rice production” ken maengganyo dagitoy a mangpaadu ti apitda nangnangruna kadagitoy a gundaway a bumasbassiten ken lallakayen dagiti mannalon.
Naammoan a ti nasao a rice paddy ket mapagbalin nga agri-tourism iti nadakamat a pagadalan.
