LAOAG CITY – Nangiwayat ti insigida nga imbestigasion ti Philippine National Police (PNP) Pasuquin mainaig iti maipagarup a panagkakabil a napasamak iti Ilocos Norte Agricultural College (INAC) iti ili ti Pasuquin.
Inpakaammo n P/Maj. Sheryll Guzman, nga insigida ti panagturongda iti nasao a pagadalan.
Ti napasamak a komosion ket pakairamanan ti agpada nga agtawen ti 18 a residente ti Barangay Carusikis ken Barangay Poblcion 1 iti isu met laeng nga ili.
Inbatad ni Guzman a nangiwayatda ti panagtataripnong nga intendaran ti School Principal Mr. Almer Ratuita, SPTA President, miembro ti Guidance Office, MSWD representatives, ken School SSLG President tapno maiapaayan ti umno a pannusa dagiti estudiante a basar ti nakailanad iti Learners’ Student Discipline Guidelines.
Basar ti imbestigasion, kuna ni Guzman a maysa nga estudiante ti nakangngeg iti padana nga agadadal a kalikagumna ti makikabil kadaytoy no sadinno a kinomprontarna iti pasado alas-4 idi Lunes, Hulio 6 ket ditoyen a napaamak ti komosion.
Segun ken Guzman, dagitoy nga estudiante ket sumango iti tallo nga aldaw a pannakasuspenso ken 6 nga oras ti community service.
Innayon ni Guzman a naigetda a kondenaren iti napasamak gapu ta daytoy ket saan nga umno para iti maysa nga agadadal.
Immuna iti daytoy, apaman ti pannakisarita ti Bombo Radyo Laoag ken ni School Principal Mr. Almer Ratuita, impasiguradona a solbarenda iti pasamak gapu ta saanda a kayat a maulit daytoyen.
