LAOAG CITY – Nagtalinaed pay laeng iti Mariano Marcos Memoral Hospital and Medical Center iti ciudad ti Batac dagiti agina a karaman iti napasamak a desgrasya iti Barangay Magnuang iti nasao a ciudad.
Segun kenni Police Lt. Col. Adrian Gayuchan, ti chief of police ti Philippine National Police iti nasao a ciudad, ita nga aldaw ket rimuar manipud iti Intensive Care Unit iti ospital dagiti biktima ken naipan da iti ward.
Mainaig iti imbestigasyon, kuna ni Gayuchan a dagiti biktima a naglugan ti kurong-kurong ket aggapo iti Barangay Pimentel ken nagal-alisto da a napan iti Barangay Tabug kalpasan a nakaawat da ti tawag manipud iti asawa ti maysa kadagiti nasugatan a nadesgrasya met daytoy.
Inlawlawag na a napaspas ti taray ti kurong-kurong nga immovertake ngem saan a dagus a nakasubli iti linya na isut gapo na a nakadinnungpar na ti nasabat na a bus.
Kunana a naamoan da pay a nakainom ti nasanger ti driver ti kurong-kurong ken nariing laeng tapno agmaneho iti dayta a gundaway.
Mainaig iti daytoy, inbatad na a saan metten a mangipila ti kaso ti pamilya dagiti biktima ken tumulong ti bus company kadagiti magastos.
Maipalagip a dagus a pimmusay ti driver ken maysa a pasahero ti kurong-kurong kalpasan a timmama da iti concrete pavement idinto a dagiti kakadua da ket nagsagaba ti sugat iti nagduduma a paset ti bagi da.
Kabayatanna, nagpalagip ni Gayuchan iti publiko a kanayon nga agannad no agmanmaneho.
