LAOAG CITY – Maiyuswat ti Land Transportation Office (LTO) Caravan iti Mariano Marcos State University-Laoag Campus intono Setyembre 23 agingga iti 24 ita a tawen.
Daytoy ti inpakaammo ni Ms. Susan Gagarin, ti mangidadaulo iti Land Transportation Office ditoy ciudad ti Laoag.
Segun ken ni Gagarin, dagiti mabenepisyaran iti nasao a caravan ket dagiti nanggundaway ti libre a theoretical driving seminar idi Setyembre 11 agingga 12 a naiyuswat iti nagduduma nga ili ken ciudad ditoy probinsya.
Inbatad ni Gagarin a dagiti maseknan ket naipaayan ti Identification Card nga isunto ti ipakita da intono kaaldawan ti caravan tapno maikkan da a dagus ti student permit.
Innayon na a mabalin pay dagiti walk-in, laketdi kwalipikado dagitoy para iti nasao a programa no sadinno a masapol a dagitoy ket indigents ken i-assess a mismo ti Department of Social Welfare and Development.
Mainaig iti daytoy, inpakaammo pay ni Gagarin nga adda ti libre a pagluganan dagiti aplikante a makipagpaset iti Land Transportation Office Caravan.
