LAOAG CITY – Natupakan ti maysa a lugan babaen iti poste ti kuryente kalpasan ti pannakadesgrasya na iti Sitio Tipcal, Barangay San Simeon iti ili ti Currimao.
Segun kenni Police Senior Master Sergeant, Lino Ancheta, ti imbestigador ti Philippine National Police iti ili ti Currimao, agpaamyanan ti behikulo a nagluganan dagiti lima nga indibidual a residente iti ili ti Magsingal iti probinsya ti Ilocos Sur.
Inbatad na nga idi nakadanon dagitoy iti agkurba a paset ti kalsada ket napukawan ti driver ti kontrol iti manibela a nangitunda ti pannakaidungpar na iti concrete barrier, pakairamanan ti poste ti telecom ken kuryente.
Kunana a gapo iti daytoy ket natupakan ti lugan dagiti biktima babaen iti poste ti kuryente ken ti driver pakairamanan ti maysa kadagiti pasahero na ket naitaray iti Rural Healt Unit para iti pannakataming ti minor injury a sinagaba da ken dagiti tallo nga akin-likod ket saan da a naan-ano.
Mainaig iti daytoy, gapo iti napasamak ket napukawan ti suplay ti kuryente dagiti sumagmamano a pagtaengan iti nasao nga ili pakairamanan iti dadduma a parte ti ili ti Badoc.
Naamoan a gapo pay iti insidente ket nangitunda ti nairot a trapiko.
Kabayatanna, nagtitinnulong met ti Philippine National Police, Ilocos Norte Electric Cooperative ken Dept. of Public Works and Highways a mangtarimaan dagiti nadadael gapo iti insidente.
