LAOAG CITY – Manamnama a mapilaan ti kaso a panaglabsing iti Republic Act 9165 ken Republic Act 9516 ti maysa a construction worker a subject ti search operation a naisayangkat iti Brgy. Gabut Norte iti ili ti Badoc.
Nabigbig daytoy a ni Ferdinand Molina Tayco a.k.a Alex Jay-Ar Tayco, Jay-ar Tayco ken Takore, agtawen ti 33, addan ti live in partner, aysa a construction worker, ken residente iti nasao a barangay.
Basar iti impormasyon, ni Tayco ket maibilang a Provincial High Value Target ti Philippine Drug Enforcement Agency.
Naamoan nga idi iserbi dagiti otoridad ti search warrant nga aggapo iti Regional Trical Court Branch 18 iti ciudad ti Batac ket ginandat ti suspek a purwakan dagitoy ti granada isut gapo na a dagus da a tiniliw daytoy.
Iti panagsukimat met dagiti otoridad iti pagtaengan ni Tayco, naala dagiti otoridad ti 25 a sachet a naglaon ti maipagarop a shabu, dua nga improvised wooden clips, maysa a light brown pouch, dua a glass tubes, dua nga open transparent plastic sachets, dua a pakete ti saan a nausar a transparent plastic sachets, maysa a pekete ti sigarilyo, ken uppat nga aluminum foil strips.
Kabayatanna, nasurok kumurang a dua a gramo ti kadagsen dagiti nakumpiskar ken agbalor ti 13,600 a pisos.
