LAOAG CITY – Naragsak nga inpakammo ni Engr. Jonathan Corpuz, ti Branch Manager ti National Food Authority (NFA) ditoy probinsya a ngumato ti paggatang da iti irik iti uppat a pisos iti kada kilo.
Segun kenni Corpuz, 23 a pisos ti paggatang to ti National Food Authority iti kada kilo ti irik ken ur-urayen da laengen ti guidelines para iti pannakaipatungpal daytoy.
Inlawlawag na a ti nabilag nga irik a gatangen da ket nasken a saan a nangatngato ngem iti 14 percent ti moisture content na wenno ti 95-100 percent purity.
Kunana nga aggatang da met latta ti 90-94.9 percent ti purity B ken mangnamnama da nga agpada ti presyo tapno ad-ado met laeng ti magatang da.
Inbatad a basar iti monitor da, 22-23 pesos ti presyo iti kada kilo ti irik ken ita ket adda dagiti aggatang ti 23-25 pesos iti kada kilo gapo ta ngimmato met ti presyo idiay Bulacan.
Naamoan a kaadoan met kadagiti agilaklako iti National Food Authority ket dagiti mannalon iti ili ti Dingras, Solsona, Nueva Era, Marcos, San Nicolas, Bacarra, pakairamanan ti Burgos, Pasuquin ken iti ciudad ti Batac.
Mainaig iti daytoy, kunana a kalikagom da pay a magatang ti target da para iti buffer stock iti sumaruno a tawen nga umabot iti 65,000 a sako ti irik.
Kabayatanna, inbatad na a ti ar-aramiden ti ahensya iti agdama ket ti pannakitaripnong kadagiti mannalon iti nagduduma a paset ti probinsya ken ti pannakangipakammo da iti lokal a gobierno ken Municipal/City Agriculturist. Malaksid iti daytoy, kunana nga adda dagiti truck nga isu ti mapan agikarga kadagiti irik nga ilako dagiti mannalon sadinno man a paset ti probinsya nangruna kadagiti ada iti adayo a lugar.
