LAOAG CITY – Inpakaammo ni Dr. Loida Valenzuela, ti Provincial Veterinarian ditoy Ilocos Norte nga alisto ti pannakaibos ti kagatgatang nga anti-rabies vaccine para kadagiti taraken nga aso ditoy probinsia.
Inbatadna nga adda ti manamnama a sumangpet a bakuna iti mabiit ngem bassit laeng daytoy.
Mainaig iti daytoy, kunana nga adda ti resolusyon nga indasarda ken ni Governor Matthew Marcos Manotoc pakairamanan iti Sangguniang Panlalawigan nga iti kada Munisipyo ket kasapulan a mangbuangay iti bukodna a pangalaan ti pundo a mausar iti panggatang ti bakuna para kadagiti aso nga adda iti lugar a sakupenda.
Inlawlawagna a napateg daytoy kas pre-emptive action tapno maliklikan a manayonan ti bilang dagiti aso nga agpositibo iti rabies.
Inpalgakna a no maipabaklay amin iti panaggatang ti bakuna iti gobierno probinsial ket marigatanda a maipaay amin a pagkasapulan.
Inyarig ni Dr. Valenzuela daytoy iti maysa a panagadal nga iti kada uppat a tao ket addaan ti maysa nga aso.
Inlawlawagna a no idasig daytoy iti populasyon iti probinsia a 609,000 ket rumrummuar nga adda ti 152,000 nga aso ditoy probinsia.
Innayonna no kastoy ti kadakkel ti bilang ti aso ditoy probinsia ket saanda kabaelan nga ipaayan amin dagitoy ti bakuna nga isu met ti rason ti panangipagunamgunamna kadagiti barangay officials ken Local Government Unit officials a tumulong pakaseknan iti daytoy a banag.
