Ad interim appointment ni Department of Heath Sec. Teodoro Herbosa, napaay a nakumpirmaran babaen iti CA

LAOAG CITY – Napaay ti Commission on Appointments (CA) a nangkumpirma iti ad interim appointment ni Department of Health (DOH) Secretary Teodoro Javier “Ted” Herbosa gapu iti kinakurang ti oras.

Pinasingkedan daytoy ni Senate President Juan Miguel Zubiri, Chairman ti Commission on Appointments ngem mabalin a mapagsasaritaan ti pannakadutok ni Herbosa inton agsubli ti sesion ti Kongreso inton Nobiembre.

Impalgak met ni Senador Christopher “Bong” Go, a nangidaulo iti hearing ti Commission on Appointments committee, a maibus ti orasda a mangdiskusion iti ad interim appointment ni Herbosa.

Gapu iti daytoy, masapul a dutokan manen ni Presidente Ferdinand “Bongbong” Marcos Jr. ni Herbosa gapu ta agpatingga ti sesion ti Kongreso inton Setiembre 30.

Iti interview, nagkedked ni Go a mangibaga a na-bypass wenno naitantan ti appointment ni Herbosa ket imbagana laeng a nasuspende ti hearing gapu ta adu a miembro ti mayat nga agsaludsod ken ni Herbosa.

Kabayatanna, nagpanawagan ti Alliance of Health Workers (AHW) iti Commission on Appointments a mangkanselar iti pannakadutok ni Herbosa kas mangidadaulo ti Department of Heath.

Basar iti Alliance of Health Workers, napaay ti Herbosa a nangidepensa iti P13.9 billion a naikissay iti naisingasing a 2024 budget iti Department of Heath.

Dinakamat ti grupo ti P10 billion budget cut iti 69 nga ospital nga imatmatonan ti Department of Heath, ti P1.7 billion budget cut kadagiti specialty hospitals ken ti P2 billion budget cut iti Philippine General Hospital (PGH).

Kinuestion ti grupo ti P8 million a naikissay iti Philippine National Aids Council ken P148-milion iti National Nutrition Council.

Maipalagip nga idi Hunio ket dinutokan ni Presidente Ferdinand “Bongbong” Marcos Jr. ni Herbosa kas baro a sekretario ti Department of Heath.

Nupay kasta, kuna ni Herbosa a karaman kadagiti prioridadna iti panagtakemna ket ti panagpatingga ti tuberculosis iti Pilipinas; makadanon iti 95% kadagiti ubbing tapno naan-anay a mabakunaan iti intero a pagilian iti kada tawen ken pabassiten ti malnutrision agingga iti 50%.