LAOAG CITY – Inbatad ni Engr. Glen Miguel, mangidadaulo iti Dept. of Public Works and Highways (DPWH) 1st Engineering District a manarimaanen ti pannakarehabilitar ti Gilbert Bridge ditoy ciudad ti Laoag.
Segun kenni Miguel, umabot iti 40 milyon a pisos ti nailatang a pondo para iti daytoy.
Inlawlawag na a no nalpasen ti bidding ket mabalinen a maimplementar ngem mabayadan laeng ti contractor intono 2024 gapo ta saan pay a maiparuk-at ti pondo ita a tawen.
Dinakamat na a ti nasao a proyekto ket mabalin nga agpaot iti dua a bulan.
Kunana a ti kangrunaan a rason no apay a nasapa ti panakarehabilitar ti Gilbert Bridge ket gapo kadagiti ado a reklamo dagiti motorista a dumalyasat.
Kabayatanna, nagpanawagan manen ni Miguel iti publiko nga aganus agingga a malpas ti pannakarehabilitar ti rangtay nangruna iti mapasaran a trapiko.
