Inbatad ni Mrs. Perlita Cabello, ti mangidadaulo iti City Social Welfare and Development Office ditoy ciudad ti Laoag a nagtalinaed nga adda ti sumagmamano a Badjao ditoy ciudad.
Kuna na a narigat a mapaksiat amin dagiti Badjao ditoy ciudad ti Laoag aglalo ket awan ti sabali nga ammo da a pamastrekan no saan a ti agpalama.
Inrakurak na nga iti kallabes ket adda ti natiliw da a Badjao no sadinno a naamoan da a ti napalamaan na iti uneg laeng ti 5 nga oras ket P1,600 a pisos.
Innayon na a ti kababaan a mapalpalamaan dagiti Badjao ket P600 a pisos iti kada aldaw.
Mainaig iti daytoy, inpakaammo ni Cabello nga agtultuloy ti panangiyimplementar da ti anti-mendicancy Law ditoy ciudad ti Laoag
Nupay kasta, segun ken ni Cabello, ti ammo dagiti Badjao ket saanen a paset ti ciudad ti Laoag ti bangir iti rangtay kas iti Barangay Nangalisan, paset ti Bombo Radyo Laoag ken dadduma pay.
Nagyaman met ni Cabello iti City Disaster Risk Reduction and Management Council nga idaulwan ni Dr. Melvin Manuel gapu ta isuda ti kangrunaan a katulungan da nga agsursursur ditoy ciudad ti Laoag tapno mamonitor no adda paylaeng dagiti badjao ken dadduma a residente ditoy ciudad nga agpalpalama wenno agdawdawat ti kwarta kadagiti umili.
