LAOAG CITY – Maluksaw ni Barangay Chairman Victor Quetoras iti Barangay 4, San Bartolome iti ili ti San Nicolas iti alegasyon kenkuana ni Barangay Kagawad John Calapena a maipagarop nga innala na dagiti naikkat a materyales iti barangay hall da idi tinarimaan da ti session hall da.
Inlawlawag ni Quetoras a dagiti dakdakamaten ni Calapena a materyales ket nakapenpen iti maikadwa a kadsaaran ti barangay hall.
Inpetteng na nga adayo nga agtakaw iti sanikua ti barangay da gapu ta iti uneg ti 31 a tawen na a nagturay no sadinno a nagsardeng laeng idi 2007-2010 ket awan pulos ti nakaidamdamagan na a madi.
Innayon na a kas pammaneknek ket ado pay dagiti naikapet iti barangay hall da a bukod na a kwarta ti inusar na.
Inpaganetget na a saan a nabaknang ngem naayat laeng a tumulong para iti pagsayaatan ti barangay da.
Mainaig iti daytoy, inpalgak ni Quetoras a namonganay ti alegasyon kenkuana ni Calapena kalpasan a siningir da daytoy kadagiti innala na a semento gapu ta usaren da daytoy a pangsemento iti pagyanan ti patron da a ni Apo San Bartolome.
Basar ken ni Quetoras, nga adda ti sobra da a semento idi pinasemento da ti kalsada da ken nagtutulagan da a no adda ti agkasapulan ket mabalin da ti mangala, ngem no kasapulanen ti barangay daytoyo ket isunto lattan ti panagbayad da.
Inpaganetget ni Quetoras a mabalin a kinagura daytoy ni Calapena gapu ta ipetpetteng ti kagawad a nakabayaden gapu ta naikkatan ti namindua ti honorarium na.
Nupay kasta, inbatad ti kapitan a ti nagbalin a palawag ti barangay treasurer ket saan na nga inik-ikkatan ti bayad ti semento ti honorarium ni Calapena ken ti laeng naikissay ket dagiti multa ken ti loan na.
Inbutaktak ti kapitan nga ado ti absent ni Calapena isut gapuna nga ado met ti multa na gapu ta napagnunumoan da a no adda ti agabsent ken saan nga agatendar kadagiti isayangkat da nga aktibidad ket mamulta.
Kabayatanna, iti panagturong ti news team ti Bombo Radyo Laoag iti pagtaengan ni Barangay Kagawad John Calapena, nagkedked a nagpainterview ngem inpetteng na nga awan ti kinapudno na ti alegasyon kenkuana, ken patien na a pammerperdi laeng daytoy ni Quetoras gapu ta agpaidasig a para kapitan iti Barangay ken Sang Kabataang elections 2023.
