LAOAG CITY – Agur-uray ti nasursurok ngem sangaribu a trabaho a maidiaya kadagiti kakailian nga agbirbiruk ti trabaho iti masungad nga aldaw ti sabado Abril 20 a pannakaisayangkat ti job fair.
Daytoy ti inpakaammo ni Mrs. Anne Marie Lizette B. Atuan, manager ti Public Employment Service Office wenno PESO ti gobierno probinsial ti Ilocos Norte wenno PGIN.
Segun kenkuana, ti nasao a bilang ti pagtrabahoan ti kasapulan dagiti duapulo a kompania a kunpirmado a makipartisipar iti nasao nga aktibidad. Inlawlawagna a malaksid kadagiti pribado a kompania ket adda pay ti pito a National Government Agencies a makipaset iti job fair kas paset ti maigiddan a pannakaisayangkat ti “one stop shop”.
Kunana a maiyur-uray pay laeng no mano nga overseas manpower agencies ti agatendar gapu ta dagiti laeng mapalubusan a makipartisipar ket dagiti addaan ti kumpleto a papeles tapno maliklikan ti pannakailaw-an dagiti kakailian kadagiti saan a sigurado a pagtrabahoan iti ballasiw taaw.
Kabayatanna, inbunannag ni Atuan a karaman kadagiti ahensia ti gobierno a manamnama a makipaset iti job fair ti Phil. Statistics Authority, Philhealth, Social Security System, Pag-ibig Fund, Civil Service Commission, Department of Labor and Employment ken Department of Migrant Workers wenno DMW pakairamanan ti PGIN ken sumagmamano a Local Government Units wenno LGU’s ditoy probinsia.
Mainaig iti daytoy, inyawis ni Atuan kadagiti kakailian nga agkasapulan iti serbisio dagiti maseknan nga ahensia ti gobierno a manggundaway iti maisayangkat a “one stop shop”.
Naituding a maisayangkat dagiti nasao nga aktibidad iti auditorium ti kapitolio probinsial mangrugi iti oras ti alas nuebe ti bigat agingga iti alas kuatro ti malem.
