LAOAG CITY – Naglikudan ni Mayor Antonio Mariano iti ili ti Marcos ti alegasyon nga agsolsolicit ti kwarta kadagiti supplier ken contractor.
Inpalgak na a saan a daytoy ti damo a maakusaran ti kastoy nga aramid gapu ta ti immuna ket iti nasapa a paset ti 2022.
Kuna ni Mayor Mariano nga iti nadakamat a tawen ket adda ti maysa a contractor a nangited ti 200 a ribo a pisos babaen ti panangipatulod na iti Gcash gapu ta ti pammati ti maseknan ket isuna ti katransaksyon na.
Innayon ti mayor a dagiti agpampammarang nga isuna ket saan da nga ammo ti agsarita ti Iluko no di ket madlaw a napeklan dagitoy a panggalog.
Inpakaammo na pay a saba-sabali a numero ti us-usaren dagiti maseknan rason a nagpanawagan iti publiko kangrunaan na dagiti contractor ken supplier a no adda ti agsolsolicit kadakuada nga us-usaren da ti nagan na ket tawagan da a dagus daytoy tapno mapaneknekan da no isuna wenno saan ti kasarsarita da.
Inpetteng na a saan nga agdawdawat ti kwarta gapu ta isuna pay a mismo ti mangmangted kadagiti agkasapulan.
