LAOAG CITY – Naitantan ti Commencement Exercises ti California State University idiay Estados Unidos gapu iti kumarkaro a maisaysayangkat a tignay-protesta.
Daytoy ti inpakaammo ni Bombo International News Correspondent Rey Villanueva manipod idiay California.
Segun kenkuana, nadismaya dagiti graduating students ti nasao nga unibersidad gapu ta saanda manen a mapadasan ti agmartsa ita nga agturposda iti kolehio agsipod ta saanda a napadasan a nagmartsa idi agturposda iti high school idi 2020 gapu iti COVID-19 pandemic.
Inbatadna a maangay koma daytoy inton Mayo 10 ngem gapu iti narisgo a situasion ket nakanselar tapno maliklikan ti dakes a mapasamak.
Inpalgakna a nangrugi ti tignay-protesta iti Columbia University idiay New York iti napalabas a lawas, simmaruno ti Emory University idiay Atlanta, Ohio University, University of Texas, California State University ken University of California Los Angeles.
Kunana nga iti University of California Los Angeles ket umad-adu dagiti agisaysayangkat ti tignay-protesta no sadino a dinakamat dagiti organizers a saanda nga agsardeng agingga nga awan ti tignay ti unibersidad ken ti White House.
Gapu iti daytoy, saanen a simrek dagiti sumagmamano nga agad-adal ken mangisursuro kadagiti unibersidad idiay Estados Unidos agsipod ta kumarkaro ti nagbaetan dagiti dua a grupo a Pro Palestine ken Pro Israeli.
Inbatadna nga iyik-ikkis dagiti estudiante ken faculty members manipod kadagiti nagduduma nga unibersidad idiay Amerika ti pannakawayawaya dagiti na-hostage a Palestinian iti ima ti Hamas, pannakaipatungpal ti ceasefire ken panagsardeng ti Estados Unidos a mangipapaay ti suporta iti Israel tapno agsardeng ti genocide no sadino dumanon iti 30 a ribu a tattao ti napapatay a kaadduan ditoy ket Palestinian.
Inlawlawagna a manipod iti East Coast ti New York agingga iti West Coast ti California ket dumanonen iti nasurok a 500 nga estudiante ken faculty members ti naarestar gapu iti nasao a tignay-protesta.
Kunana a kidkiddawen dagiti University Administrator ti tulong dagiti law enforcers tapno maisardeng ti kumarkaro a tignay-protesta a dumanonen iti nasurok nga 40 nga estado ti Amerika.
Innayonna a kuna ni House Speaker Mike Johnson iti press conference a mangipasada ti measure tapno maalay-ayan ti pungtot ken mapatgan ti kiddaw dagiti mangiwaywayat ti tignay-protesta.
