LAOAG CITY – Nagballigi dagiti otoridad a nangtiliw iti maysa a lalaki iti naisayangkat drug buy-bust operation iti Barangay Upon iti ili ti Pinili.
Nabigbig ti subject ti operasyon a ni Joseph Cabie y Marquez, agtawen ti 55, mannalon, drug surenderree ken residente iti nadakamat a barangay.
Dagus a kinemmeg dagiti otoridad ti suspek kalpasan a naglako ti maysa a sachet a naglaon ti maipagarop a shabu iti nagpammarang kas poseur buyer.
Iti panangkapkap dagiti otoridad iti suspek ket naala pay iti ikotna ti siyam a sachet a naglaon ti maipagarop a shabu a dagitoy ket naikarga iti lata ti mentos, kasta pay ti sangaribo a pisos a nausar iti operasyon.
Basar iti nagpammarang a poseur buyer, kayat pay ti suspek a panayunan koma ti gatangen na a maipagarop a shabu.
Inbatad dagiti otoridad a ti nasao a suspek ket maibilang kas Street Level Individual.
Nagtalinaed ti suspek iti kustodyar ti Philippine National Police iti ili ti Pinili.
Kabayatanna, saanen a nangipaay pay ti komento ti suspek seknan iti pannakatiliw na.
